by

Durante Fulan Marsu DTT Munisípiu Baucau Hatama Osan $. 5.635


Durante fulan marsu tinan ne’e Diresaun Transporte Terrestre Munsipiu Baucau hatama rezeita hamutuk rihun lima atus neen tolu nulu resin lima dollares (5.635) amerikanu ba kofre estadu.

Ba jornalista RCLM-Baucau Diretor DTT Munisípiu Baucau Roberto da Crus kuarta feira ne’e hateten, osan hirak ne’e rekoilla husi parte inspesaun nian ho osan rihun rua atus walu lima dollares (2.805),transporte publiku nian ho osan rihun ida atus hitu hitu nulu dollares (1.770),karta kondusaun nian ho osan atus lima sia nulu resin lima dollares (595),enkuantu kona ba rejistu nian ho osan hamutuk atus haat neen nulu resin lima dollares (465).

Nia afirma maske fulan Marsu DTT halo deit atendimentu ba kliente sira fulan sorin deit ne’ebé hahu husi loron ida to’o loron sanulu resin lima maibe konsege hatama osan ho montante boot ba kofre estadu kompara ho fulan hirak liu ba.

“Diresaun Transporte Terrestre Munisipal Baucau rekoilla rezeitas iha fulan marsu nia laran ne’ebe ema mai halo trata dokumentu hanesan inspesaun,transporte publiku sira,karta kondusaun no kona ba rejistu ne’ebe nia total osan ne’ebe ami rekoilla hamutuk lima ribu enam ratus tiga puluh lima dollar,no ami servisu fulan sorin deit ne’ebe ami servisu dia 1-15 fulan marsu deit tamba liu ida ida ne’e ita iha ona serka sanitaria ne’ebe ami labele halo atendimentu” Dehan Diretor DTT Munisípiu Baucau Roberto da Crus ba jornalista kuarta feira,(21/04/21).

Roberto da Crus esplika dau-daun ne’e DTT Baucau kontinua halo atendimentu ba kliente sira, liu-liu ba kondutores sira ne’ebé trata dokumentus hanesan karta kondusaun mate atu halo moris fali,maibe ba motorista sira ne’ebé hakarak tuir teste ezame oral no eskrita seidauk autoriza tamba kumpri regra Organizasaun Saáde Mundiál.

“oras ne’e dadaun ami halo atendimentu deit ba sira ne’ebe mak inspesaun mate transporte publiku no sira ne’ebe mai rejistu no sira ne’ebe mak karta kondusaun mate ona mak mai ami bele atende maibe ba parte sira seluk ami labele lai depois ida ne’e mos ami la obriga durante serka sanitariu ne’e sira ne’ebe mak inspesaun ka lisensa transporte publiku mate ami la fo multa ba sira,ba karta kondusaun ami simu mak balun ne’ebe hakarak atu mai rejistu ami pronto maibe ba atendimentu hanesan eskrita ho oral ita para lai tamba ita bazeia ba rezolusaun governu ne’ebe fo dehan katak labele halibur ema liu nain sanulu ho razaun ne’e mak ami labele fo eskrita no oral ba kliente sira” Roberto da Crus salient.

Tuir observasaun jornalista Radio Comunidade Lian Matebian nian,iha edifisiu Diresaun Transporte Terrestre Munisipiu Baucau nota katak, kliente sira ne’ebé mai trata dokumentus mínimu liu kompara molok implementa serka sanitaria no konfinamentu obrigatoriu.

Jornalista : Agus Guterres

Editór :Agus Guterres

Comment