by

Karreta Baskolante Ida Baku Fila Rezulta Ema Ida Mate, Nain Ida Kanek Kaman no Pasajeirus Nain Haat Seluk Kondisaun Diak


Karreta baskolante ho sapa matrikula 58043 baku iha Area Laritoi Suku Samalari Postu Administrative Baguia Munisípiu Baucau rezulta Domingos Xavio Ximenes tinan tolu nulu resin walu mate fatin tamba hetan hanehan husi foos ne’ebé karreta refere tula.
Lia hirak ne’e hato’o husi Komandante Polisia Eskuadra Baguia Sarjentu Xefe Alberto Piedade Gusmão ba jornalista RCLM-Baucau Tersa-Feira ne’e iha nia residensia.

Nia esplika asidente ne’e akontese hafoin matebian hamutuk ho karreta nain mai hola sasan iha baucau hanesan foos,manu_tolun,ayam potong hodi fila ba baguia maibé to’o iha area laritoi rezulta ponte tohar hodi halo karreta baskolante baku fila no foos hanehan matebian iha mota laran hodi la bele salva an ikus mai domingos xavio mate fatin,enkuantu rezulta mos pasajeirus ida ho idade neen nulu resin hetan kanek Kaman iha parte ain no nain haat seluk ho kondisaun di’ak.

“Karreta ne’e hori bainrua ba sosa sasan sira hanesan foos MTCI duaratus saak,manu_tolun, no ayam potong iha baucau no hori kalan fila fali mai mak to’o iha samalari ponte tohar no karreta baskolante ne’e baku fila hodi rezulta ema nain ida mate,ida kanek Kaman,no pasajeirus iha karreta laran hamutuk ema nain neen,karreta baskolante ne’e privadu,ema nain ida ne’ebe mak mate ne’e naran Domingo Savio Ximenes,no agora dadaun karreta iha hela mota laran tamba dada sai la diak ne’ebe karreta nain kala sei buka eksa hodi ajuda dada sai,sasan sira ne’e hoban hotu deit iha bee laran no aproveita hotu” Dehan Komandante Polisia Eskuadra Baguia Sarjentu Xefe Alberto Piedade Gusmão ba jornalista RCLM-Baucau Tersa-Feira,(06/04/21).

Komandante hatutan dadaun ne’e ponte refere nafatin kotu hodi tranporte sira husi diresaun Baguia Baucau labele halo viajem tamba ponte refere hari’I uza ai hodi labele augenta atu transporte hanesan baskolante,bus, no foso la bele liu ba mai.

“agora karreta boot sira liu ladiak tamba ponte ne’e uza halo ai no ponte uza halo ai ne’e kleur ona tamba halo iha tinan 2015 to’o agora ne’ebe ai kakeu sira ne’ebe mak uza halo ponte ne’e dodok hotu ona,no gora dadaun ne’e motor sira liu maibe karreta boot sira mak la bele liu” Alberto Piedade Gusmão Haktuir.

Entertantu dadaun ne’e karreta ho sasan loja nian sei nafatin iha mota laran hodi hein ekipamentus pazadu ajuda dada sai.

Jornalista : AG no CP

Editór : Agus Guterres

Comment