by

WVTL Munisípiu Baukau Komemora Loron Internasionál Feto


WVTL (World Vision Timor-Leste) munisipiu Baucau komemora loron feto internasional iha area Waibeana-Fatumaka suku Gariuai postu administrative Baukau vila ho nia objetivu oinsa ema hotu valoriza feto maluk sira ne’ebe mak durante ne’e ema nunka tau matan ba sira tanba liu husi komemorasaun ne’e bele fahe informasaun ba sira fo hanoin ba sira.

“Tanba ne’e importansia husi komemorasaun ne’e oinsa mak ita nia feto maluk sira valoriza sira ninia an, maske durante ne’e sira hatene sira ninia knar no dever ne’ebe sira halo maibe durante ne’e sira nunka valoriza sira nia an, entaun liu husi atividade simplis ne’ebe World Vision inisia iha aldeia Waibeana ida ne’e oinsa mak bele valoriza ita nia feto maluk sira para sira mos hatene katak feto nia papel importante ba dezenvolvimentu familia no dezenvolvimentu rai ida ne’e”dehan kordenador programa ba Futuru livre husi violensia husi WVTL Baucau Mariano Pinto iha nia abertura Sabadu (13/3) iha aldeia Waibeana suku Gariuai.

Nia afirma liu husi komemorasaun loron internasional feto ne’ebe realiza iha area Waibeana-Fatumaka ne’e bele fanu ona sira, i sai mos hanesan bukae ida ba sira para sai hanesan feto ne’ebe mak forte iha sira nia familia no sosiadade, iha ne’ebe komemorasaun ne’e tuir lolos halao iha dia 8 maibe atraza ho atividade familia nian adia fali iha dia 13 tanba kada tinan governu sempre komemora loron feto mundu tomak nian.

Xefe departamentu relasaun sosiadade sivil munisipiu Baucau Regina de Sousa hateten iha tinan 2020 konsege partisipa loron mundial feto internasional nian iha nasaun Australia hodi hato’o preukupasaun feto Timor-Leste nian iha komemorasaun refere.
“Iha tinan kotuk estadu Timor-Leste fo fiar mai hau ba partisipa loron internasional feto nian iha ita nia nasaun vizinu Australia hau konsege hato’o preukupa feto Timor Leste nian iha ne’eba, laos preukupasaun feto Baucau nian deit maibe feto Timor nian hotu”dehan Regina

Presidenti assosiasaun feto potensial munisipiu Baucau ne’e esplika loron feto internasional mosu hahu husi nasaun Amerika, iha momentu ida feto sira ne’ebe sai trabaillador servisu iha kompana ida maibe simu osan salario ki’ik liu kompara ho mane sira

“Ita nia maluk feto sira iha Nova Iorke ita nia grupu feto sira sai trabailador servisu entaun sira nia salario ki’ik tebes kompara ho mane sira, entaun feto sira halibur malu halo demonstrasaun hasoru hakerek letra bo-bo’ot iha spanduk atu kompana hasae salario feto sira nian, hahu ida ne’e mak adopta ona lei internasional konvensaun Cedo ne’ebe deskriminasaun hasoru feto sira mos iha dever atu komemora loron feto sira nian”dehan Regina.

Iha tempu hanesan Felisberta V. Da Costa kondisaun fiziku defisiente maske ho ai tonka senti kontenti tebes husi uma mai partisipa iha komemorasaun loron internasional feto nian tanba hakarak rona informasaun ruma husi world vision no presidenti assosiasaun feto munisipiu Baucau nian konaba loron internasional nian.

“Maske hau defisiente hodi deit ai tonka maibe hau gosta atu mai rona komwemorasaun loron mundial ne’ebe realiza husi ita nia agensia World Vision realiza iha ami nia aldeia laran”dehan Felisberta.

Komemorasaun loron internasional feto termina ho fahe aifunan husi parte world vision ba kazal par lima ne’ebe hola malu kleur nu’udar lembra ida ba sira wainhira fou-foun hola malu simu sakramentu kaben.
Komemorasaun ne’e partisipa husi grupu feto kompostu husi suku Uailili, Buibau no Gariuai.
Jornalista : Agus Guterres
Editór : Agus Guterres

Comment