by

Sosiedade Sivil husu Komunidade Fó Imformasaun ba Autóridade Lokál Bainhira Bainaka Ruma Viajem Husi Estranjeiru.


Relasiona ho transmisaun lokál ne’ebé dadaun ne’e la’o Munisípiu Baucau inklui Munisipiu sira seluk sosiedade sivil Munisípiu Bauca husu ba komunidade sira hodi fó imformasaun ba autoridade lokál,liu-liu ekipa imformasaun jestaun krize Munisípiu Baucau bainhira bainaka ruma viajem husi estranjeiru hodi hala’o vizita. Presidente Assosiasaun ONGs Munisípiu Baucau Augosto Pires, hato’o lia hirak ne’e wainhira partisipa Talk Show iha Studio Radio Komunidade Lian Matebian Baucau kuarta feira ne’e.

Nia afirma tamba dadaun ne’e situasaun transmisaun lokál la’o maka’as iha komunidade sira nia le’et tamba ne’e nia parte husu atu komunidade sira tenki matan moris neon nain.

“Primeiro viziñus sira iha obrigasaun tomak atu imforma ba autoridade lokál kona ba ita nia bainaka ida ne’e, ho situasaun ida Covid 19 agora la’o manas los iha ita nia rai laran, bainaka sira mai ita la deskonfia i la imforma mak agora daudaun akontese iha Baucau laran“ Dehan Presidente Assosiasaun ONGs Munisípiu Baucau Augosto Pires Kuarta-Feira,(11/03/21).

Augosto Pires argumenta husu mos ba autóridade lokál sira tenki halo identifikasaun ba bainaka sira ne’ebé mak vizita Suku ,Aldeia no Postu Administrativu sira liu-liu munisipiu hodi nune’e nafatin halo prevensaun husi pandemia surtu covid-19, Aleinde ne’e nu’udar sosiedade sivil, nia parte nafatin fó hanoin ba governu lokál hodi tau atensaun ba situasaun hirak ne’e.

“Ita nia Autoridade sira tenke hatene, bainaka sira ne’ebévmai vizita ita nia suku, aldeia, postu ka munisipiu ne’e ita nia Autoridade sira tenke hatene atu nu’une prevene situasaun ida Covid 19 ne’e, ami hanesan sosiedade sivil parseira ho governu nia ba iha dezenvolvimentu lokál ami sei fo hanoin nafatin ba ita nia governu lokál atu tau atensaun ba situasaun sira hanesan ne’e, se sira iha sintomas automatikamente saude tenke atende lalais no mos halo prevensaun atu nune’e evita moras ida ne’e, nu’udar sosiedade sivil iha obrigasaun atu bolu, fanu ita nia governu atu tau atensaun“ Nia haktuir.

Presidente Assosiasaun ONGs Munisípiu Baucau sublina, tuir observasaun ne’ebé nota katak iha terreinu komunidade iha Munisípiu Baucau kuaze maiória mak kumpri regras husi Ministériu Saúde no Organizasaun Saúde Mundiál nian hanesan uza maskra no distansiamentu sosial.
Jornalista :NB and CP

Editór :Agus Guterres

Comment