by

Stock Ran Menus iha HoREX Baucau Pasiente Sira Obrigadu Tenki Transfere ba HNGV


Stock ran menus iha Hospital Rejional Eduardo Ximenes Baucau,liu-liu iha sala maternidade halo parteira no doutor espesial ba partus nian obrigatoriu tenki transfere inan sira ba Hospital Nasional Guido Valadares hodi halo tratamentu saúde.

Lia hirak ne’e, hato’o husi Xefe Departamentu Maternidade HoRex Baucau, Bernardina Freitas Marcal ba jornalista sira segunda feira ne’e hateten,durante ne’e iha sala maternidade pasiente hamutuk nain lima mak horex baucau transfere ona ba HNGV Dili tamba pasiente hirak ne’e menus ran aleinde ne’e iha hospital HoREX mos stock ran menus tebes hodi fornese ba pasiente sira obrigatoriu tenki transfere ba dili.
Nia afirma,relasiona ho stock ran ne’ebé menus parte médiku sira bolu familia pasiente sira hodi ajuda fornese ran ba pasiente ne’ebé presiza maibé wainhira familia buka ran la iha ikus liu mak doutor sira transfere ba dili.

“Iha tinan ida ne’e hamutuk nain lima mak halo transferensia ba dili,transferensia ba dili ne’e tamba kauza ran menus liu no iha ita nia hospital ne’e mos ran ida ne’ebe atu fornese atu ajuda ba inan sira ne’e limitadu tebe-tebes dalaruma ita tenki presiza bolu familia ajuda hodi tau ran maibe dalaruma familia husi dook entaun oinsa mak ita atu salva lalais inan sira ne’e doutor sira deside halo transferensia ba dili. Dehan Xefe Departamentu Maternidade HoRex Baucau, Bernardina Freitas Marcal ba jornalista RCLM-B,(Segunda-feira,25/01/21) iha nia servisu fatin.

Bernardina Freitas Marcal hatutan,rekomenda ministériu saúde atu buka meius seluk hodi halo koperasaun CVTL no ajensia seluk hodi halo doasaun ba stock ran HoREX baucau nune’e ba futuru labele transfere pasiente sira ba HNGV dili.

“Sim hakarak servisu hamutuk ho CVTL no ajensia sira seluk ami nia stock ran ne’ebe ami atu ajuda ba inan sira ne’e bele mantein nafatin atu nune’e ami labele halo transferensia barak liu ba dili tamba iha ne’e ami doutor sira kompletu maibe iha transferensia ne’e tamba iha ne’e limitadu ran“ Bernardina Freitas Marcal salienta.

Enkuantu Tékniku Laboratorium HoREX Baucau Jorge Correia Boavida, reforsa liu tan,ho stock ran ne’ebé menus, iha hospital HoREX baucau afeita tebes ba sala maternidade no sala operasaun tamba pasiente ne’ebé moras wainhira presiza ran maibé stock ran menus halo pasiente sira tenki transfere ba Hospital Nasiona Guido Valadares Dili no dadaun ne’e stock ran ne’ebé menus mak hanesan ran tipu A,B no AB.

“Iha hospital ne’e liu-liu grupu de sangue A,O,no mos B,ran AB ne’e menus liu maibe difikulta liu wainhira kuandu grupu de sangue iha AB ne’ebe mak iha bele afeita tamba difisil la halimar atu hetan“ Dehan Tékniku Laboratorium HoREX Baucau Jorge Correia Boavida.

Tuir observasaun jornalista RCLM Baucau nota katak stock ran menus hahu husi tina rihun rua rua nulu to’o agora sei kontinua menus iha sala laboratorium HoREX Baucau.

Jornalista :Agus Guterres & Abrão Freitas

Editór: Agus Guterres

Comment