by

Durante Semana Rua Komunidade Cailara Komsumu Deit Udan Been


Durante semana rua komunidade Cailara Aldeia Ana-Ulu Suku Bahu Postu Administrativu Baucau Villa komsumu deit udan been hodi aguaenta ba nesesidade loro-loron , tamba parte Servisu Agua no Saneamentu (SAS) Munisípiu Baucau la loke bee mos ba sira.

Tuir Representante Komunidade Cailara Suku Bahu Angelino da Costa ba Jornalista Radio Comunidade Lian Matebian Baucau segunda feira ne’e, hateten, durante semana rua parte SAS la loke bee mos ba sira, komunidade tenki obriga an komsunu udan been ne’ebé mak iha.

Angelino da Costa afirma , kuaze komunidade iha area Cailara tempu udan barak mak aproveita udan been hodi komsumu tamba la iha bee mos , aleinde ne’e tuir nia tempu bai loron komunidade sira ne’e tenki lao ain ho distánsia ne’ebé dook hodi kuru bee mos.

“Ami komsumu mak udan been deit , maibe se karik la udan ami ne’e atu sai said,ba ami komunidade area Cailara tomak mak la hetan bee mos laos hau deit no ami hotu hein deit mak udan been tamba SAS la fornese bee mai,maibe kuandu tempu bai loron ne’e ami tenki ba kuru bee tamba husi karreta bombeirus sira mai ne’e tenki ense iha tanki agora komunidade iha ne’e barak mak uza bidon deit ne’ebe bidon ida ne’e karreta bombeirus sira lakohi mai ense ne’ebe ami labele hetan bee mos ne’ebe balun tenki kuru bee iha bee matan Waimori Bere no Waimori iha suu Bui Bau nia ho distansia kilometru ida resin’’. Dehan Representante Komunidade Cailara Suku Bahu Angelino da Costa ba Jornalista RCLM Baucau,(Segunda,18/01/21).

Representante komunidade Cailara ne’e akresenta, husu ba parte SAS hodi tau atensaun ba ekipamentus sira ne’ebé avaria hodi halo manutensuan lalais tamba komunidade refere kada tinan sempre sai vítima ba bee mos.

“Hau enome de komunidade Cailara nian hau husu deit ba liu-liu ida ne’ebe responsavel ba SAS nian hanesan xefe SAS nia tenki toma atensaun ba ninia membru sira ne’e kuandu kanu ruma at karik sira tenki halo atendimentu tamba ami Cailara ne’e vitima ba bee mos ne’e bei-beik ona ida ne’e mak ami husu tamba ami komunidade presiza liu mak bee mos tamba hatene katak Cailara ne’e la iha bee ida ke mosu iha ne’e,no ami mos husu bainhira kuandu kanu ruma mak at sira SAS tenki halo avizu ruma husi Radio Comunidade para bele fo hatene katak kanu mak at labele sira ne’e hanesan alas an deit ami telfone sira,hau rasik mak ba to’o iha kantor maibe sira iha ne’eba alas an tun sae deit ida ne’e mak ami husu labele akontese tan hanesan ne’e hare’e ba kanu ruma ladiak hadia lalais para ami komunidade Cailara ne’e komsumu bee”. Angelino da Costa haktuir.

Entertantu hatan ba kestaun ne’e Xefe Departamentu Agua Saneamentu Bee Urbana Franscisco da Costa Castro rekuiñese , parte SAS la fornese bee ba komunidade refere durante ne’e tamba kanu tohar,maibé tuir nia iha tempu badak nia laran sei halo manutensaun ba kanu ne’ebé tohar hodi nune’e komunidade sira bele hetan fali bee mos ho orariu normal ne’ebé iha.

“simm bee ne’eba durante ne’e lao maibe tamba kanu ne’e iha hotu deit rai leten ne’ebe foin dadauk hetan estragus tamba karreta mak sama entaun kanu tohan kotu hodi komunidade sira ne’eba labele hetan bee mos, agora sasan ida ne’ebe ami troka ne’e iha ami nia gudang ne’e sei limitadu hela, ne’ebe iha semana ida ne’e nia laran ami buka meius hodi aranja atu iha semana ida ne’e nia laran ne’e ami sei hadia hodi komunidade sira bele hetan fali bee ho normal”.Dehan Xefe

Departamentu Agua Saneamentu Bee Urbana Franscisco da Costa Castro iha nia kna’ar fatin.
Tuir observasaun Jornalista Radio comunidade Lian matebianBaucau nota katak komunidade iha area Cailara barak mak dadaun ne’e seidauk asesu ba bee mos.
Jornalista: Agus Guterres And Calistro Pereira

Editór : Agus Guterres

Comment