by

Durante Fulan Tolu AC Laboratórium HoREX Baucau at fó Difikulta ba Makina Mindray

Servisu laboratórium Hospitál Rejionál Eduardo Ximenes Baucau Durante fulan tolu ona hahu husi fulan juñu to’o setembru tinan ne’e ekipa servisu tékniku la bele halao servisu atende pasiente hasai ran ho diak tamba Air Condition(AC) at hodi fo difikulta ba makina mindray la bele halo examinasaun ho diak tamba wainhira ekipa servisu tékniku obriga sei fo resultadu ne’ebé la klaru.

Kesatun ne’e hato’o husi Xefe Unidade Laboratórium HoREX Baucau José Martins Sarmento ba jornalista sira kinta feira ne’e hateten AC at hahu iha loron neen fulan juñu to’o agora kontinua at halo ekipa servisu tékniku laboratórium la bele halao atendimentu ho diak tamba mákina mindray wainhira manas nia taka an rasik.

Nia afirma ho problema hirak ne’e apresenta direita ona ba ministra saúde wainhira halao nia vizita mai iha HoREX Baucau maibé to’o agora seidauk hetan respostas ruma tamba ne’e parte ekipa servisu tékniku laboratórium hein deit AC foun husi nasional.

“ Balun lao diak, balun lao la diak liu-liu ba CBC to’o agora ami labele halo kuaze fulan tolu liu ona, ne’ebe hahu iha 06/06/2020 to’o agora ami labele halo examinasaun tamba ami nia air condition la diak, momentu senhora ministra mai iha ne’e ami direitamente hato’o assuntu ida ne’e maibe to’o agora seidauk bele realiza tamba nusa, ami hanesan nu’udar teknika ami la bele hatene to’o iha diresaun nia servisu, maibe ami konsidera tenta nafatin ami nia diresaun maibe ami nia diresaun mos dehan katak ita hein deit bainhira mak AC bele instala ita bele kontinua tamba ne’e mak ami seidauk bele halo examinasaun ba CBC, primeiru ami labele halo tamba makina ne’e presiza malirin se makina taun makina ne’e taka an deitˮ. Dehan Xefe Unidade Laboratórium HoREX Baucau José Martins Sarmentoba jornalista RCLM,(kinta-feira 10/9/20) iha HoREX Baucau.

Entertantu pasiente Fransisco Ximenes senti la menta ho fasilidade laboratórium HoREX nian relasiona ho AC at durante fulan tolu ona, halo nia hein to’o semana ida mak foin simu rezultadu hasai ran tamba ran lori ba HNGV Dili.

“Ohin dadersan hau mai foti rezultadu ran dara kimia nian, ba ami pasiente ami la menta ho ho situasaun ida ne’e tamba ida ne’e hospital rejional ne’ebe tenki kompleta ho fasilidade por ezemplu foti ran dara kimia ne’e tersa feira mai konsulta, kuarta feira madrugada ami hasain ran kinta ohin mak foin foti rezultadu, hau hanoin ida ne’e hospital rejional bele akumula pasiente husi vikeke,lospalos,no baucau rasik ho komunidade barak hanesan ne’e sira presiza hasai ran tenki halai to’o dili ne’e problema boot, ne’ebe ami husu ba governu liu-liu ministeriu relevante liu-liu ministeriu saude para atu hare situasaun ida ne’e oinsa bele kompleta atu nu’une faselita ita nia komunidade sira ne’ebe mak vulneravel tamba se situasaun ida ne’e lao nafatin la menta tamba la bele ajuda komunidade sira tamba liu-liu ema ne’ebe mak mak presiza hasain ran ema hotu-hotu tenki halai ba to’o iha dili, depois to’o iha ne’eba mos dalaruma makina at tenki tunda entaun ida ne’e ladun diak tamba ida ne’e mak ami husu ba governo sentral liu-liu ministeriu saude atu hare ba situasaun ida ne’e ho didiak ˮDehan pasiente Fransisco Ximenes.

Aleinde ne’e wainhira iha kazu emerjensia ruma parte laboratórium sempre fo hatene ba família pasiente atu halo doasaun ran.(af)

Jornalista :Abrão Freitas

Editór : Agus Guterres

Comment