by

Ahi Han Uma Komunidade Ida Iha Suku Buruma


Ahi han uma komunidade ida iha suku Buruma area eis komarka Kaisa postu administrative Baucau Vila Munisípiu Baucau Domingu horseik iha tuku ida ho balun oras Timor-Leste, rezulta sasan uma laran la iha ida hetan salva tamba uma nain sai hotu.

Kestaun nee hatoo husi rian vitima Domingos dos Santos ba jornalista sira hateten akontesimentu ne’e akontese wainhira vitima José da Costa ba servisu tuir projetu estrada no nia fen kaben ba to’os hare tomate hafoin hela derepenti deit akontese ahi han husi uma laran nian ne’ebé deskonfia akontese sirkuitu ruma tamba antes sira sai husi uma hamate hotu kedas ahi iha uma laran.

Nia afírma akontesimentu ne’e vizinu sira mak hare depois hakilar joven sira hodi balde tau be’e rega ahi maibe la konsege tamba ahi aumenta lakan makas ikus mai konsege rezulta sasan uma laran inklui osan dollares atus hitu walu nulu ahi han motuk hotu.

Akontesimentu ahi han uma bainhira hau nia rian ba halo hela servisu projetu ho Xina sira iha Estrada, nia ferik oan mos sai, bainhira sira han tiha meudia nian sira sai hotu depois ahi han nia uma ami neebe hela besik iha nee mos la hatene derepenti ahi han husi uma nia kakuluk mai mak mana ida hakilar ami halai mai bolu joven sira mai lori balde rega mais la konsege salva sasan uma laran inklui osan dolar atus hitu ualu nulu, dehan rian vitima Domingos dos Santos ba jornalista sira Segunda feira (7/9) iha Baucau.

Husi sorin seluk xefe do suku Buruma Liborio dos Santos Freitas rekoinese akontesimentu ahi han uma komunidade ida iha area eis komarka Kaixa nian

Nia parte Segunda feira dadersan halo kedas indentifikasaun ba fatin akontesimentu hare katak akontese ahi han duni uma komunidade ida nian ne’ebé deskonfia parte rua, ida dala ruma uma nain mak la hamate ahi matan dapur nian no ida seluk dala ruma sirkuit hosi fiu eletresidade..

Ohin hau too ona iha fatin akontesimentu ahi han uma hare katak akontese ahi han uma maibe uma nain la iha tanba sei ba urus dokumentu atu hatama ba departamentu prevensaun informasaun dezastre naturais munisipiu Baukau nian, I akontesementu ita deskonfia parte rua, parte ida ita deskonfia sira sunu hela ahi iha uma laran mak la hamate parte ida seluk ita deskonfia ba sirkuit eletresidade“dehan Liborio.

Wainhira jornalista komfirma ba xefe Departamentu Prevensaun Informasaun Dezastre Naturais Munisípiu Baucau Nelson Abilio Nunes hateten seidauk simu informasaun husi autóridade suku no aldeia sobre akontesimentu ahi han uma iha suku Buruma maibé nia parte kontinua hein bainhira to’o mai sei fó apoiu sasan emergensia nian hanesan aihan no laos aihan.

Too meudia ida ne’e hau seidauk simu informasaun ruma tantu husi nai xefe suku, xefe aldeia inklui vitima sira rasik, maibe bainhira sira lori dadaus mai ami pronto atu fo apoia sasan emergensia nian hanesan aihan no laos aihan“dehan Nelson

Dadus vitima dezastre naturais ahi han uma iha suku Buruma parte departamentu prevensaun informasaun dezastre naturais munisípiu Baucau seudauk simu informasaun husi autóridade suku no aldeia.(adg)

Jornalista :Calistro Pereira

Editór: Agus Guterres

Comment