by

Komunidade Suku Libagua Antuasiasmu Simu Atividade Edukasaun Sívika

Komunidade suku Libagua kompostu hosi aldeia tolu hanesan Tirilolo, Lari-Muta no Buibata antuasismu partisipa atividade edukasaun sívika hosi Komisaun Nasional Elisaun ho tema “Liu Hosi Edukasaun Sívika Ita Hakbi’it Sensu de Pretense Ba Aktu Elitoral” hodi hasae koñesementu komunidade nian oinsa hatene lalaok elisaun nian wainhira ezerse nia direitu ba elisaun ne’ebé sei mai.

Antusiasmu ne’e hatutudu liu hosi partisipasaun komunidade suku Libagua hahu hosi labarik, joven no katuas ferik sira iha sentru komunitáriu aldeia Tirilolo mezmu kondisaun estrada ne’ebé la diak do’ok maibé balun lao ain, uza transporte privadu hodi tuir aktividade edukasaun sívika ne’ebé fahe hosi CNE no STAE.

Reprezentante komunidade suku Libagua Afonso da Silva Gama hateten ho antusiasmu mai tuir aktividade edukasaun sívika tanba hakarak rona informasaun klaru hosi lideransa CNE no STAE inklui rona informasaun hosi parte seguransa nian kona-ba akontesementu sunu no estraga uma populasaun nia iha suku nunira semana foin liu ba.

“Atividade edukasaun sivika ne’ebe halao husi CNE atu aumenta ami nia kapasidade no koinesimentu atu hatene diak liu tan eleisaun tinan 2022 ho 2023 ninian para ami povu hatene, inklui rona informasaun konaba situasaun enjeral Laga nian husi ami nia siguransa sira”dehan reprezentante komunidade suku Libagua Afonso da Silva Gama ba Radio Lian Matebean Baucau Tersa feira (25/8) hafoin remata partisipa atividade edukasaun sivika.

Iha tempu hanesan Xefe Suku Libagua Francisco de Carvailho Gama hateten prezensa CNE ne’e hodi fó informasaun ba komunidade hosi aldeia tolu hanesan Tirilolo, Lari-Muta no Buibata hodi eduka joven ne’ebé atinji ona ho idade sanulu resin ne’en inklui ferik katuas sira atu hatene nia direitu iha prosesu elisaun nian.

Nia afírma, daudaun ne’e totál populasaun suku Libagua hamutuk rihun ida atus hitu lima nolu resin sia ho xefe familia hamtuk atus tolu ualu nolu resin hat.

“Prezensa CNE nian mai iha aldeia tolu suku Libagua nian hau hanoin fo informasaun ba komunidade sira konaba prosesu eleisaun ninian oinsa mak sidadaun ida ezerse ninia direitu ba eleisaun, liu-liu baa mi nia joven sira ne’ebe foin atinji tinan 16 atu ba 17 hetan kartaun eleitoral”dehan xefe suku Ligagua.

Entertantu komisariu CNE Jose Belo iha nia diskursu hateten edukasaun sívika ne’e hala’o atu sidadaun sira ne’ebé atinji ona idade sanolu resin hitu ba leten iha direitu atu tuir votasaun no direitu ema atu hili nia.

Demokrasia ne’e mosu tanba iha opiniaun ne’ebe diferente, partidu ne’ebe diferente, opsaun para ita atu hili laos ida deit maibe barak ne’ebe ita atu konkista ita sei uza ita nia kakutak, programa ne’ebe diak ita hili tanba ita atu sai jogador ne’ebe diak ita tenke kumpriende ninia lalaok ka ema bolu aturan ne’e tenke los”dehan komisariu CNE Jose.

Administrador postu Laga Sabino Ximenes apresia tebes ho prezensa parte CNE ho STAE tanba bele motiva joven sira ne’ebe idade atinji ona dizaseis atu ba dizasete oinsa hetan kartaun eleitoral atu partisipa iha kualker eleisaun ne’ebe iha.

Aktividade edukasaun sívika ne’e hetan partisipa masimu hosi administrador postu Laga,komandante PNTL eskuadra Laga, estrutura suku Libagua ho nia komunidade sira inklui ekipa CNE Nasional,Munisipiu ho Stae Munisipiu.(adg)

Joenalista :(AG)

Editór : Agus Guterres

Comment